Zuzenbideko Ikasle Abertzaleak eta ikasle asanbladaren oharra

Tribuaren Berbak, ETB1eko saioaren azkeneko atalean, Juana Goizueta EHUko Zuzenbide Fakultateko dekanoak euskarak Zuzenbide Ikasketetean duen presentziaren inguruan mintzatu zen.

Hori dela eta, Leioako Zuzenbideko Ikasle Abertzaleak eta asanbladak ohar bat plazaratu dute.

Leioako Zuzenbideko Ikasle Abertzaleak eta ikasle asanbladaren oharra

Pasaden abenduaren 14ean UPVko Zuzenbideko dekanoa den Juana Goizuetak ETB1ek emititzen duen Tribuaren Berbak "Euskara justizia eske" saioan agertu zen.

Bertan, euskaraz aritu nahi dugun ikasle orok euskaraz egiteko eskubidea bermatua daukagula baieztatu zuen, errealitatean ikasleok euskaraz bizi eta ikasteko ditugun zailtasunak ahantziz.

Ez da bidezkoa euskararen normalizazio bidean errealitatean islatzen ez de egoera bat irudikatzea, gutxiago, egi borobilak ez esanez Zuzenbideko atal guztiak euskaraz ematen direla baieztatzea. Ez dugu ukatzen azken urteetan aurrera pauso handiak eman direla. Zoritxarrez, oraindik asko falta zaigu gure fakultate zein ikasgeletan euskararen egoera osasuntsuaz hitz egiten hasteko.

Besteak beste euskaraz ikasteko dugun kalitatezko ikasmateriala urria da, ia nulua. Gainera, abokatu izateko derrigorrezkoa zaigun abokatutza masterraren parte handiena espainolez egin beharko dugu, abokatuak izateko bai edo bai gazteleraz ikasi beharko dugularik.

Jakina da euskararen normalizazioak lana suposatzen duela, baina harrigarria iruditzen  zaigu inoren buruak horrela goraipatzea euskaraz ikasteko ditugun zailtasunak ikusita. Argi dugu oraindik bere normalizazio bidean heman beharreko pausuak izugarriak direla eta ospatzeko ezer gutxi daukagula.

Izugarri poztu gaitu Zuzenbideko dekanoaren partetik euskararen alde borrokatzeko grina ikustea. Ikasleok, bai asanbladaren partetik bai IAren partetik jadanik bildu gara UPVko instituzio desberdinekin. Espero dugu euskararen inguruan esandakoak egi bihurtzea eta hitzetatik ekintzetara pasatzea.

Leioako Ikasle Asanblada eta Zuzenbideko Ikasle Abertzaleak

[Jaialdia] MADAMA's Party!

Gizarte eta Komunikazio Zientzien fakultateko talde feministak, MADAMAK, ostegun honetarako, abenduak 11, jaialdi izugarria prestatu dute.

Egitaraua:

• 17:30etan, Bilgune Feministaren eskutik 'Jostorratzak dantzan ditugu' emakume abertzaleen  VI. topaketa feministen aurkezpena.

• 19:00tan Bertso musikatuak Malen Amenabar eta Maialen Akizurekin.

• 20:30etatik aurrera PINTXOPOTE + DJ MDMk!!!

Zuzenbideko Ikasleak: "Euskarazko ikasleok Abokatutza Masterra gure hizkuntzan egiteko eskubidea aldarrikatzen dugu"

Zuzenbideko ikasleak behin gradua amaituta egitera derrigortuta dauden Abokatutza Masterra euskaraz eta Leioan egitea aldarrikatu dute: "Euskal Herriko Unibertsitatean bertan euskaraz ikasteko oztopoak ditugu, eta hau aldatzeko azkeneraino iristeko prest gaude. Hitz eta promesetatik konpromisoa erakustera eta benetan Euskal Herrian euskaraz ikasteko eskubidea bermatzeko lan egitera deitzen ditugu Euskal Herriko Unibertsitateko ordezkariak".

Zuzenbideko ikasleen oharra:

Abokatutza masterra euskaraz eta leioan!

Egun, abokatu izateko derrigorrezkoa zaigu zuzenbideko ikasleoi Abokatutza Masterra egitea. Joan den urtean eskaini zen lehen aldiz Euskal Herriko Unibertsitatean abokatutza masterra eta, aurreko asteetan aditzera eman dugunez, ez zen euskarazko talderik sortu.

Hurrengo ikasturteari begira arazoa errepikatzen da, eta euskarazko ikasleok berriro ere egoera diskriminatzaile baten aurrean aurkitzen gara. Honetaz gain, euskarazko masterra deitzen dioten hori, ez da inondik inora horrela; izan ere, master osoaren %38a baino ez dago bermatuta euskaraz, hizkuntza honetan irakatsi dezaketen irakaslerik kontratatu ezin delako aitzakiarekin. Hori al da Euskal Herriko Unibertsitateak euskarazko master bati ematen dion garrantzia?

Azken egunetan hainbat eskaera ezberdin helarazi dizkiogu euskara errektore ordeari. Bere esanetan “euskarazko” taldea bermatuta dago baldin eta 12 ikasle matrikulatzen badira (aurrez ezarritako kopurua 8 ikaslekoa zen). Kopuru minimo honi beste inguruabar batzuk gehitu behar dizkiogu, “euskarazko” taldea sortzea ikaragarri zailtzen dutenak:

• Abokatutza masterra gazteleraz Donostiako eta Leioako kanpusetan eskaintzen den bitartean, “euskarazko” masterra bi kanpusetako batean eskainiko dela adierazi dute. Non izango den erabat zehaztu ez duten arren, ziurrenik Donostian izango dela esan digute. Eskubide urratze larritzat jotzen dugu hau. Adibidez, ez dago edonoren esku Donostian masterra ordaintzeaz gain, pisu bat ere ordaintzea, edo eguneroko garraioa ordaintzea. Horrela, euskarazko masterra soilik kanpus batean eskaintzea matrikulazioak atzera botatzeko arrazoi argia da.

• EHU-k euskarazko masterra aurrera joatearen kontrako arazo nagusi bezala diru falta adierazi izan digute. EHU-ko aurrekontuak bestelako proiektuetara bideratzen direla ikusirik, aurrekontu hauen kudeaketaren arduradunei ikasleen formakuntzari lehentasuna ematea eskatzen diegu.

• Horrez gain azpimarratu behar da estatuko abokatutza masterraren amaieran egiten den estatu mailako azterketa gazteleraz soilik eskaintzen dela. Legearen arabera Autonomi Erkidego bakoitzak antolatu dezake azterketa hau. Oraindik ez da pausu hau eman, eta ez digute aurrera eramango dutenaren seinalerik eman. EHU-ren konpetentzietatik haratago dagoen zerbait dela argudiatzen dute. Honek ere, euskarazko eskaeren jaitsiera ekartzen du, eta Euskal Herriko Unibertsitateak bere esku dagoen guztia egin beharko luke hau aldatzeko.

Guretzako abokatutzan jarduteko beharrezkoa den master bat dela kontutan hartu behar dugu, askoren etorkizunean ezinbestekoa izango dena. Horrela izanda eta zuzenbideko gradua bere osotasunean euskaraz eskainita, bai Donostian zein Leioan, eskubide urraketa larritzat jotzen dugu Abokatutza Masterra “euskaraz” kanpus batean soilik eskaintzea eta gainera ikasle kopuru minimo baten esperoan gelditzea.

Leioako Zuzenbideko euskarazko ikasleok Abokatutza Masterra gure hizkuntzan egiteko eskubidea aldarrikatzen dugu, Leioan eta Donostian, denon eskura dagoen master bat eskainiz. Horrez gain Euskal Herriko Unibertsitateari eskatzen diogu bere esku dagoen guztia egiteko estatu mailako azterketa euskaratzeko.

Euskal Herriko Unibertsitatean bertan euskaraz ikasteko oztopoak ditugu, eta hau aldatzeko azkeneraino iristeko prest gaude. Hitz eta promesetatik konpromisoa erakustera eta benetan Euskal Herrian euskaraz ikasteko eskubidea bermatzeko lan egitera deitzen ditugu Euskal Herriko Unibertsitateko ordezkariak. Era berean gonbidapena luzatzen diegu zuzenbideko ikasle zein irakasleei, arazo honek guztioi eragiten digula ulertzen dugulako.

Medikuntza eta Zuzenbideko Asanbladak: "Gure proposamenen aurrean jarrera adeitsu eta ulerkorra izan eta lanean jarraitzeko prestutasuna erakutsi dute"

Pasa den azaroaren 12an burutu zen euskararen aldeko manifestazioan medikuntza eta zuzenbideko asanbladetako kideek EHUko euskara errektore ordeari hizkuntza honen aldeko aldarrikapen jakin batzuk helarazi zioten. Hori dela eta, azaroaren 20ean asanblada bakoitzeko kideak euskara errektore ordearekin bildu ziren. 

Hemen duzue bi asanblada hauek batera atera duten oharra:

Euskaraz ikasteko eskubidea hainbat urtez Euskal Herri osoko ikasgeletan burutu izan den aldarrikapen bat izan den arren, oraindik ez dira euskaldunon hizkuntza eskubideak betetzen.  Badira hilabete batzuk UPV/EHUko hainbat fakultatetako ikasle asanbladok gaia lantzen hasi ginenetik eta egungo egoeraz kezkaturik, biltzen hasi eta honi erantzun bat emateko dinamikak martxan jartzea erabaki genuenetik. Horren harira Leioako Kanpusean euskararen aldeko manifestazio bat deitu genuen, “EUSKARAZ IKASI ETA BIZI NAHI DUGU” lelopean.

Manifestaziora ehunka ikasle hurbildu ziren, beraien hizkuntza eskubideen alde borrokan egiteko prest. Fakultate eta eskola ugaritako jendea batu ginen. Medikuntza eta Zuzenbideko Asanbladetako ordezkariok gure eskari eta proposamenak errektoretzari helaraztea zen asmoa. Hasiera batean oztopoak jarri zizkiguten arren, euskara errektore ordearekin biltzea lortu genuen; gure aldarrikapenak eta datu ezberdinak biltzen zituzten dokumentuak entregatu eta beste bilera bat egiteko konpromezua hartu zuelarik.

Azaroaren 20an izango zen hitz emandako bilera hura. Egun horretan UPV/EHUko Euskararen arloko errektore ordeak, Jon Zaratek, eta Ikasle, Enplegu eta Gizarte Erantzukizunaren arloko errektore ordeak, Maite Zalaiak, bilerara deitu gintuzten Medikuntza eta Zuzenbideko Asanbladak.

Medikuntzakook izandako bileran nagusiki bi puntu landu genituen. Alde batetik, orain arte euskaraz izandako ikasgai bat, Leioako Kanpuseko ikastegian ematen den Anatomia Patologiko Orokorra, gauetik goizera gazteleraz izateko arriskuan egoteaz hitz egin genuen. Egoera errektoretza taldeko bi kideei azaldu eta hauek arazoaren konponbideak aztertzen daudela adierazi zuten, ziurrenik ikasgaia euskaraz mantenduko dela baieztatu zuten, ez baitago atzerapauso hau gertatzeko pisuzko arrazoirik.  

Horrez gain, Osakidetza eta EHUren artean dagoen hitzarmenaz aritu ginen. Medikuntzako 4, 5 eta 6. mailak ospitaletan egiten ditugu, eta bertan ditugun irakasleak, irakasgai gehienetan behintzat, Osakidetzako medikuak dira. Ospitaleetan irakasle dabiltzanen kontratazioa arautzen duen hitzarmena berrikusi beharra planteatu genuen ikasleok, euskararen presentzia urria aldatze aldera. Gure proposamena nahikoa ondo hartu zuten, eta hau sakonago aztertzeko konpromisoa hartu zuten.

Zuzenbidekoon kasuan, gure arazo nagusiena abokatu izateko Madriletik jarri diguten derrigorrezko masterra da. 4 urtetako gradua egiteaz gain, 2 urtetako masterra eta estatu mailako azterketa bat egitera derrigortzen gaituzte. Masterra zein estatu mailako azterketa espainol hutsez da, euskaldunon eskubideak berriro ere urratzen direlarik.

Orain arte ez da masterra euskaraz eskaini, baina funtsezkoa iruditzen zaigu etorkizunean euskaraz arituko diren abokatu eta prokuradoreak egoteko. Hamabi ikasleek osaturiko gutxiengo talde bat egonez gero masterra euskaraz egiteko taldea sortzeko konpromisoa hartu zuten.

Orokorrean, unibertsitateko irakasle zein langileen euskara maila eta ikasmaterialen urritasun zein kalitate eskasaren inguruan jardun genuen ere, planteatu genituen puntu gehienetan bat etorri ginelarik. Ondoren, fakultatean hauen arazo zehatzak landu genituen.

Errektoreordeekin izan genuen bileratik baikor irten ginen bi taldeak. Gure proposamenen aurrean jarrera adeitsu eta ulerkorra izan eta lanean jarraitzeko prestutasuna erakutsi zuten. Aurrera begira jarrita, urtarrilaren 14rako jarri genuen hurrengo batzarra.

Hala ere, argi dugu ez dugula gure arazoen erantzukizuna bakarrik euren eskuetan utziko, klaseak eta kaleak astintzen jarraituko dugu, euskal ikasleriaren kontzientziak pizten eta horren oinarrizkoa den eskubide honen urraketa gizarteratzen.

Baikor eta itxaropentsu begiratzen diogu aurretik datorkigunari, pausoka-pausoka baikoaz, pixkanaka baina pausu txikienak ere, Euskal Herri euskaldun horretara hurbilduko gaituela jakinik, Euskararen herri horretara.

Denon artean, lortuko dugu!

Medikuntza eta Zuzenbideko asanbladak.

[ERREPORTAJEA] Bideoteka

Unai eta Telmo Gizarte eta Komunikazio Zientzien fakultateko ikasleak dira. Filmak izugarri gustoko dituzte. Horregatik daude bideoteka bolondres moduan kudeatzen; bai eta EHUk bekadunak ordaintzeko dirurik ez eta bideoteka itxita ez egotearren.

Gehiago jakin nahi?